Fyrir leiðbeinendur

First Lego League Ísland er keppni fyrir rúmlega 20 lið sem koma alls staðar að af landinu.
Í hverju liði eru 4-10 ungmenni á aldrinum 10-16 ára og a.m.k. einn fullorðinn leiðbeinandi.

Þar sem verkefnið er þverfaglegt eru möguleikarnir miklir fyrir leiðbeinendur að nýta sína eigin sérþekkingu og kunnáttu og hentar verkefnið flestum þeim sem starfa með ungmennum á aldrinum 10-16 ára, hvort sem það eru kennarar eða starfsmenn grunnskólanna, starfsmenn félagsmiðstöðva, foreldrar o.s.frv.

Ekki þarf að vera sérfræðingur í sérstakri grein heldur vera sá leiðbeinandi sem heldur vel utan um liðið og styður þau í gegnum allt ferlið.

Háskóli Íslands heldur utan um Facebook-hóp fyrir leiðbeinendur og biður alla leiðbeinendur að vera með í Hjálparhópi Leiðbeinenda.

ATHUGIÐ! upplýsingarnar hér að neðan er verið að uppfæra í takt við útgefnar upplýsingar frá FLL

FIRST LEGO League keppnin 2026 verður haldin laugardaginn 14. nóvember 2026 í Háskólabíó.

Þema ársins 2026 er BIOGLOW™

BIOGLOW™ er hluti af FIRST® CANOPY™ tímabilinu. Í ár vinna liðin með verkefni sem tengjast líffræðilegri fjölbreytni, vistkerfum og því hvernig vísindi, tækni, verkfræði, stærðfræði, samvinna og sköpun geta hjálpað okkur að skilja og vernda náttúruna.

Líffræðileg fjölbreytni sýnir heilsu jarðarinnar okkar. Plöntur, dýr, sveppir, vistkerfi og fólk tengjast á margvíslegan hátt, og þegar við skiljum þessi tengsl betur getum við hannað lausnir sem styðja við heilbrigðari og sjálfbærari framtíð.

Í vélmennahluta keppninnar hanna og forrita liðin LEGO® vélmenni sem leysir verkefni á keppnisvellinum. Verkefnin líkja eftir raunverulegum ferlum í náttúrunni, meðal annars dreifingu fræja, sveppanetum, rannsóknum í trjákrónum, vernd búsvæða og varðveislu tegunda.

Í nýsköpunarverkefninu velja liðin vandamál sem tengist líffræðilegri fjölbreytni, rannsaka það og hanna lausn sem getur haft jákvæð áhrif. Liðin þróa hugmyndina sína áfram, safna endurgjöf og kynna lausnina fyrir dómurum á keppnisdegi.

BIOGLOW™ snýst um að læra af náttúrunni, vinna saman, prófa hugmyndir, bæta lausnir og nota tæknina til að byggja betri heim.

Athugið: FIRST LEGO League 2026 verður síðasta FIRST LEGO League keppnin á Íslandi. Vélmennakeppnir fyrir íslenska skóla halda þó áfram og nánari upplýsingar um framhaldið má finna í kaflanum Frá FLL yfir í WRO hér fyrir neðan.

Kynningarmyndband fyrir BIOGLOW™

Hér má sjá kynningarmyndband fyrir BIOGLOW™ tímabilið.

Sumum finnst gott að prenta þessi skjöl út til að hafa til hliðsjónar. Mikilvægt er að kynna sér REGLURNAR Í VÉLMENNAKAPPLEIKNUM mjög vel (Robot Game Rulebook), þar sem þær gilda um uppsetningu vallar, stigagjöf, leikreglur og framkvæmd vélmennakappleiksins.

Keppnin er alþjóðleg og því er stærstur hluti stuðningsefnis frá FIRST á ensku. Við höfum einnig þýtt lykilefni fyrir BIOGLOW™ 2026 á íslensku, þar á meðal reglubók vélmennakappleiksins, verkefnahandbók fyrir nemendur og glærur fyrir 12 kennslustundir.

Smellið á hlekkina hér fyrir neðan til að hlaða niður PDF skrám fyrir BIOGLOW™ 2026. Glærurnar eru í sér kafla hér fyrir neðan: Glærur að 12 kennslustundum.

Reglur, þema og uppfærslur

Handbækur og kennsluefni

HANDBÆKUR sem við mælum eindregið með að þið nýtið ykkur í ferlinu:

ATH: Reglur og uppfærslur frá FIRST geta breyst á tímabilinu. Við mælum með að leiðbeinendur skoði reglubókina og nýjustu uppfærslurnar reglulega fram að keppni.

Hér má finna glærur fyrir BIOGLOW™ 2026 kennslustundirnar. Glærurnar eru bæði til á íslensku og ensku. Þær fylgja 12 funda ferlinu í verkefnahandbókinni og eru hugsaðar sem stuðningsefni fyrir leiðbeinendur.

Íslenskar glærur

English slides

Flokkaðu LEGO pokana sem eru í Challenge Set kassanum eftir númerum. Pokarnir eru merktir og mikilvægt er að passa að pokanúmerin samsvari réttu byggingarleiðbeiningunum hér fyrir neðan.

  • Flokkaðu LEGO pokana eftir númerum.
  • Passaðu að pokanúmerin samsvari réttu númerunum hér að neðan.
  • Opnaðu réttu PDF skrárnar og hafið gaman af því að setja líkönin saman.
  • Við mælum eindregið með því að opna aðeins eitt sett af pokum í einu svo kubbarnir blandist ekki saman.
  • Hafið gaman!

Yfirlit

Byggingarleiðbeiningar fyrir þrautirnar

Uppstilling á velli

Myndband um uppstillingu vallar


Hér má sjá myndband sem sýnir uppstillingu vallarins fyrir BIOGLOW™ 2026.


</div

Þraut ársins

Öll skráð lið fá senda þraut ársins í byrjun skólaárs. Þraut ársins (nokkurs konar þrautabraut) tengist þema ársins hverju sinni. Þrautinni er komið fyrir á þar til gerðu æfingaborði sem hægt er að smíða sjálfur smkv. leiðbeiningum frá First Lego League.

Spike Prime vélmennið  frá Lego Education.

Nauðsynlegt er fyrir liðin að eiga eða hafa aðgang að Spike Prime þjarkinum (þá má ennþá nota gamla Mindstorms EV3 þjarkinn en hann er smám saman að detta út). Hægt er að panta LEGO® Education SPIKE™ Prime vélmennið í gegnum First Scandinavia eða frá öðrum umboðsaðilum.

Nánari upplýsingar um Spike Prime:

VÉLMENNAKAPPLEIKUR

  • Liðin keppa tvö og tvö saman.
  • Þrautir ársins leystar á þar til gerðri þrautabraut með legó-þjarkinum.
  • Stig fást fyrir hverja leysta þraut.
  • Besta umferðin gildir.
  • Kynnið ykkur reglur brautar og stigagjöf vel!

VÉLMENNAFORRITUN OG HÖNNUN

  • Liðið hittir forritunardómara í lokuðu rými.
  • EINUNGIS liðið má svara spurningum.
  • Hönnun og forritun vélmennis könnuð – sýnt og spjallað.

NÝSKÖPUN

  • Tekist á við raunverulegt vandamál/verkefni í nærumhverfinu, tengt þema ársins.
  • Frumleg lausn/hönnun fundin.
  • Niðurstöðum deilt með öðrum í kynningu á sal.

LIÐSHEILD

  • Metin út frá því hvort liðin fari
  • Liðin setja upp bás í anddyri Háskólabíós til að kynna sig og sitt verkefni.
  • Liðin hvött að fara á milli bása og kynnast hvert öðru.

  • Halda utan um liðið og sjá um að skrá það til leiks.
  • Vera liðinu hvatning.
  • Sjá til þess að allir njóti sín, fái verkefni við hæfi, læri sem mest og hafi gaman af.
  • Munið að liðið sjálft tekur ákvarðanir! - "Góður leiðbeinandi leiðbeinir og leiðir ferlið - en ekki innihaldið!"

Hér eru skemmtilegir hópeflisleikir frá First Lego League Scandinavia.

Skráning í First Lego League Challenge fer fram hjá Háskóla Íslands í maí - júní ár hvert.

Einungis 24 lið komast að, svo mælt er með tímanlegri skráningu.

Þátttökukostnaður er 55.000 kr á hvert lið sem skiptist eftirfarandi:

  • 25.000 kr fyrir þraut ársins
  • 30.000 kr í keppnisgjald.

Einnig er hægt að nálgast eldri útgáfur af þrautabrautinni til æfingar að kostnaðarlausu Búnaðarbanka Skóla- og frístundasviðs Reykjavíkurborgar, á meðan birgðir endast.

  • 20.apríl - 8.maí: skráning í keppnina 2026 https://forms.cloud.microsoft/e/sSBEv3Sf6e
  • Ágúst: þraut ársins opinberuð
    • brautir koma til landsins og sendar til skólanna
  • Byrjun september: rafrænn fundur fyrir leiðbeinendur
  • 13. nóvember: uppsetning bása
    • öll keppnislið mæta í Háskólabíó til að stilla upp fyrir bása-kynningar
  • 14. nóvember: LEGOkeppnin í Háskólabíó
  • Lok nóvember / byrjun desember: danska úrslitakeppnin og/eða skandinavíska úrslitakeppnin í Noregi
  • Apríl 2027: Heimsleikarnir í Bandaríkjunum

Nýmennt á Menntavísindasviði HÍ heldur námskeið/fund með leiðbeinendum í upphafi skólaárs þar sem farið er yfir helstu þætti keppninnar og þema útskýrt.

Mælt er með því að allir leiðbeinendur skrái sig í Hjálparhóp leiðbeinenda á Faceboook sem Háskóli Íslands sér um, þar er hægt að komast í samband við aðra leiðbeinendur, spyrja spurninga, miðla reynslu sinni o.s.frv.

Við hvetjum ykkur til að skoða leiðbeininga myndbönd frá First Lego League á Youtube þar sem farið er yfir þrautir fyrri ára og þar munu birtast myndbönd fyrir þraut ársins.

Einnig er mælt með því að leita vel á netinu, því finna má keppendur um heim allan sem eru einnig að spreyta sig á First Lego League-þrautinni, hafa spurningar og miðla reynslu sinni.

Gagnlegar upplýsingar um First Lego League og keppnir um allan heim má finna á alþjóðlegri síðu FLL.

Nöfn keppenda

Leiðbeinendur fá sent skráningarskjal nokkrum vikum fyrir keppni þar sem þeir þurfa að senda inn upplýsingar um liðið sitt. Þar er tekið fram hvort liðið óski eftir gistingu í Reykjavík, hingað til hafa nágrannaskólar verið keppninni innan handar og boðið liðum gistingu.

Skráning þessi er nýtt við undirbúning á keppninni, gerð viðurkenningarskjala, innkaup á hádegismat fyrir þátttakendur og fleira. Gangið því úr skugga um að upplýsingar séu rétt slegnar inn.

Eftirfarandi upplýsingar þurfa að koma fram:

    • Nafn liðs, nafn skóla, full nöfn allra keppenda og full nöfn leiðbeinenda.
    • óskir um gistingu
    • Ef um einhver fæðuofnæmi er að ræða.

    Liðin mæta daginn fyrir keppni til að stilla upp básnum sínum í anddyri Háskólabíós.

    Á keppnisdeginum sjálfum fær hvert lið eigin dagskrá og fer á milli svæða í Háskólabíó til að:

    • kynna nýsköpunarverkefnið sitt (í sal)
    • vera með básakynningu (í stóra anddyri)
    • hitta hönnunar- og forritunardómara (í lokuðu herbergi)
    • keppa í vélmennakappleik (í stóra sal - streymt beint á netinu)
    • nota æfingaborð (í bíó-anddyri)
    • taka þátt í sameiginlegri dagskrá
    • nærast
    • skoða sýningarsvæðið
    • fá verðlaun
    • njóta og hafa gaman!

    • Besta nýsköpunarverkefnið
    • Besta liðsheildin
    • Besta hönnun og forritun á vélmenni
    • Vélmennakappleikur
    • FLL meistari - boðið að keppa fyrir hönd Íslands erlendis

    Frá FIRST LEGO League yfir í World Robot Olympiad

    FIRST LEGO League 2026 verður síðasta FIRST LEGO League keppnin hér á landi. FIRST og LEGO hafa gefið út að samstarfi þeirra ljúki eftir þetta tímabil og því munum við ekki halda áfram með FIRST LEGO League á Íslandi eftir keppnina 2026.

    Þetta þýðir þó ekki að vélmennakeppnir fyrir íslenska skóla séu að hætta. Þvert á móti munum við færa áhersluna yfir í World Robot Olympiad™ (WRO®), sem verður nýr vettvangur fyrir íslenska vélmennakeppni.

    Margir íslenskir skólar hafa byggt upp dýrmæta reynslu í FIRST LEGO League. WRO tekur við sem næsta skref og býður áfram upp á nám, samvinnu, sköpun, forritun og tæknilega áskorun, en með öðru keppnisfyrirkomulagi.

    Hvað breytist?

    Í FIRST LEGO League tóku lið þátt í nokkrum þáttum á sama tíma, meðal annars vélmennakappleik, nýsköpunarverkefni, hönnun og liðsheild. Í WRO velur hvert lið einn keppnisflokk, til dæmis RoboMission eða Future Innovators.

    WRO leyfir fjölbreyttari tæknilausnir og forritunarmál, svo lengi sem lið fylgja reglum þess keppnisflokks sem þau velja. Þetta opnar fyrir breiðari nálgun á vélmenni, forritun og lausnamiðaða hönnun.

    Reglur WRO eru birtar í janúar og íslenska landskeppnin fer fram að vori. Alþjóðleg WRO mót fara síðan fram að hausti.

    Nánari upplýsingar um World Robot Olympiad á Íslandi má finna á wro.hi.is.

    SPIKE™-settin

    LEGO® Education hefur gefið út að sala á SPIKE™ settum hætti frá og með sumrinu 2026. SPIKE-settin nýtast þó áfram vel í kennslu, verkefnavinnu og undirbúningi fyrir vélmennaverkefni.

    Það er því engin þörf á að skipta um búnað strax. Skólar geta áfram nýtt þann búnað og þá reynslu sem byggst hefur upp í FIRST LEGO League, samhliða því að við færum okkur yfir í World Robot Olympiad.