FIRST LEGO League 2026 verður haldin 14. nóvember 2026 í Háskólabíó.

Þema ársins 2026: BIOGLOW™

Þema FIRST LEGO League 2026 er BIOGLOW™, hluti af FIRST® CANOPY™ tímabilinu. Í ár vinna liðin með verkefni sem tengjast líffræðilegri fjölbreytni, vistkerfum og því hvernig tækni, sköpun og samvinna geta hjálpað okkur að skilja og vernda náttúruna.

Í vélmennahluta keppninnar hanna og forrita liðin LEGO® vélmenni sem leysir verkefni á keppnisvellinum. Verkefnin tengjast meðal annars ferlum í náttúrunni, til dæmis dreifingu fræja, sveppanetum, rannsóknum í trjákrónum, vernd búsvæða og varðveislu tegunda.

Í nýsköpunarverkefninu velja liðin vandamál sem tengist líffræðilegri fjölbreytni, rannsaka það og hanna lausn sem getur haft jákvæð áhrif. Liðin þurfa að útskýra hugmyndina sína, sýna hvernig þau þróuðu hana áfram og segja frá því hvernig hún gæti nýst öðrum.

BIOGLOW™ snýst því um að læra af náttúrunni, nota STEM, samvinnu og skapandi hugsun, og hanna lausnir fyrir heilbrigðari og tengdari framtíð.

Endalok FIRST LEGO League

Keppnin 2026 verður síðasta FIRST LEGO League keppnin hér á landi. FIRST og LEGO hafa gefið út að samstarfi þeirra ljúki eftir þetta tímabil og því munum við ekki halda áfram með FIRST LEGO League á Íslandi eftir keppnina 2026.

Vélmennakeppnir fyrir íslenska skóla halda þó áfram. Eftir FIRST LEGO League 2026 munum við færa áhersluna yfir í World Robot Olympiad™ (WRO®), sem verður nýr vettvangur fyrir íslenska vélmennakeppni.

Margir íslenskir skólar hafa byggt upp dýrmæta reynslu í FIRST LEGO League. WRO tekur við sem næsta skref og býður áfram upp á nám, samvinnu, sköpun og tæknilega áskorun, en með öðru keppnisfyrirkomulagi.

Frá FIRST LEGO League yfir í World Robot Olympiad

Í FIRST LEGO League tóku lið þátt í nokkrum þáttum á sama tíma, meðal annars vélmennakappleik, nýsköpunarverkefni, hönnun og liðsheild. Í WRO velur hvert lið einn keppnisflokk, til dæmis RoboMission eða Future Innovators.

WRO leyfir fjölbreyttari tæknilausnir og forritunarmál, svo lengi sem lið fylgja reglum þess keppnisflokks sem þau velja. Þetta opnar fyrir breiðari nálgun á vélmenni, forritun og lausnamiðaða hönnun.

Reglur WRO eru birtar í janúar og íslenska landskeppnin fer fram að vori. Alþjóðleg WRO mót fara síðan fram að hausti.

Nánari upplýsingar um World Robot Olympiad á Íslandi má finna á wro.hi.is.

SPIKE™-settin

LEGO® Education hefur gefið út að sala á SPIKE™ settum hætti frá og með sumrinu 2026. SPIKE-settin nýtast þó áfram vel í kennslu, verkefnavinnu og undirbúningi fyrir vélmennaverkefni.

Það er því engin þörf á að skipta um búnað strax. Skólar geta áfram nýtt þann búnað og þá reynslu sem byggst hefur upp í FIRST LEGO League, samhliða því að við færum okkur yfir í World Robot Olympiad.